ކުނޑި ފުކަކަށްވުރެ ނިކަމެތި އިންސާނާ

ފަޒީލްއަކީ މީހުންނަށް ޖެއްސުން ކުރުމުގާ އަރާހުރިމީހެކެވެ. އޭނާގެ ސަބަބުން މީސްމީހުންގެ އެތައް ޅަ ދަރިންނެ ހަލާކުވެއެވެ. އޭނާގެ ކަމަކީ ރަނގަޅަށް ކިޔަވާ ކުއްޖެއްނަމަ އެކުއްޖެއްގެ މަގު ފުރެއްދުމެވެ. ގިނަފަހަރު ކުދިން ހަލާކުކޮށްލުމަށް އޭނާ ގެންގުޅޭ ފުރުތަމަ އުކުޅަކީ ފޯނު މެދުވެރިކޮށް ކޮންމެވެސް ދަޅައެއް ދައްކައިގެންނެވެ. އެގޮތުން ގޭމް ކުޅުމަށް ދެވި ހިފުވައެވެ. އެއަށްފަހު ބޮޑަށް ގާތްވުމުން އޭނާއާއެކު ގިނަ ވަގުތު އުޅުަށް އެދެއެވެ. އެއަށްފަހު ސިނގިރެޓްފަދަ ތަކެތި އެކުދިންނަށްދީ އޭނާއާ ވީހާވެސް ގާތްކޮށް އޭނާ ކުރާ ވިޔަފާރިތަކުގެ ވާހަކަ ދައްކާ އޭގާ ބައިވެރިކުރެއެވެ. ގިނަ ކުދިން ފަޒީލްގެ ވިޔަފާރީގާ ބައިވެރިވެ އޭގެ އަވައިގަ ޖެހި އެޔާނުލާ ނުވެސް އުޅެވޭ ހިސާބަށްދެއެވެ. މިކަން ބޮޑުވެގެން އެތައް ބެލެނިވެރިންނެއްގެ ޝަކުވާއާއެކު ފަޒީލް އެތައް ފަހަރަކުވެސް ހައްޔަރުކުރެވިފާވެއެވެ. ނަމަވެސް ގިނަ ދުވަސްތަކެއްނުވެ ދޫކޮށްލެވެއެވެ.

އެހެން ދުވަސްދުވަހެކޭ އެއްގޮތައް މިއަދުވެސް ފަޒީލްހުރީ ކުއްޖަކު މަގު ފުރައްދަން ހިތުލައިގެންނެވެ. މިއަދު އޭނާ ދިމާކުރަން ނިންމައިގެންހުރީ ރިޝްވާން ކިޔާ ކުއްޖަކާއެވެ. ރިޝްވާންއަކީ މަޔަކާ ބަފަޔަކަށް ލިބިފައިހުރި ހަމައެކަނި ދަރިޔެކެވެ. ވަރަށްވެސް ހިތްހެޔޮ ތެދުވެރި ސަކަ މީޒާޖެއްގެ ކުއްޖެކެވެ. އެތައް ބަޔެއްގެ ލޯބި ލިބިފައިވާ މޮޅަށް ކިޔަވަމުން އަންނަ ކުއްޖެކެވެ. ރިޝްވާން ކްލާސް ނިންމާފަ އަންނަތަން ފެނުމާއެކު ފަޒީލް އޭނާގެ މަސައްކަތާގެން ކުރިޔަށްދިޔައެވެ.

ފަޒީލް : އޭތް ރިޝްވާން ކޮންތާކަށް؟

ރިޝްވާން : މިދަނީ ގެޔަށް

ފަޒީލް : މިތާ ހުރި ޖޯއްޔަށް ހިނގާބަލަ އެއްޗެއް ދައްކާލާނަން

ރިޝްވާން : ކޮންއެއްޗެއް؟

ފަޒީލް : އައިމައެއްނު އެނގޭނީ

އެއްވެސް ޖެހިލުމެއްނެތި ރިޝްވާން ފަޒީލްއާއެކު ޖޯއްޔަށް ދިޔައެވެ. ފަޒީލް ފޯނު ހުޅުވާލާފަ ޕަގްޖީ އެޅުވިޔެވެ. އަދި އެ ކުޅެންފެށިއެވެ. ރިޝްވާން ފަޒީލް ކުޅޭތަން ބަލަންއިންދާ ބަންގީގެ އަޑު އިވެންފެށިޔެވެ.

ރިޝްވާން : އޭ މަ ދަނީ އެނގޭ ބަންގި އެ ގޮވަނީ

ފަޒީލް : ކޮންތާކަށް ތި ދަނީ؟

ރިޝްވާން : ނަމާދަށް

ފަޒީލް : މަޑުކޮށްބަލަ މި ގަނޑު ނިމެންދެން

ރިޝްވާން : ނޫނޭ. ޖަމާއަތުގާ ކުރާ ނަމާދުން ލިބޭ ސަވާބު މާ މުހިންމު ތިޔަށްވުރެ

ފަޒީލް : ނަމާދުން ފައިބައިގެން އަންނައްޗޭ

ނަމާދަށްދިޔަ ރިޝްވާން ނައުމުން އެތައް އިރަކު ޖޯލީގަ އޮވެފާ ފަޒީލް ގެޔަށްދިޔައެވެ. ޖެހިގެން އަންނަ ދުވަހު ދިމާކުރުމަށް ނިންމައިގެންނެވެ.

ޖެހިގެން އައި ދުވަހުވެސް ފަޒީލް ރިޝްވާންއާ ދިމާކުރިޔެވެ. ނަމަވެސް ރިޝްވާންގެ ހިތަކަށް އޭނާއަށް އުޅެ އުޅެވެސް ބަދަލެއް ނުގެނެވުނެވެ. އެންމެ ފަހަށް ފަޒީލްގެ ރައްޓެހިންނަށް ރިޝްވާން ތައާރަފްކޮށް އެމީހުންނާއެކު ވަގުތުކޮޅެއް ހޭދަކުރުމަށް އެދުނެވެ. ގްރޫޕް ހަދާފަ އެންމެންގޮސް ޖޯލީގާތިބެ އެކި ގޭމްތައް ފޯނުން ކުޅެންފެށިޔެވެ. މިހެން ތިއްބާ ބަންގީގެ އަޑު ޖެހޭއިރަށް ރިޝްވާން ދާން ހިނގާގަތެވެ.

ފަޒީލް : ކަލޯ ދެން މަޑުކޮށްލަބަލަ ފަހުންވެސް ނަމާދަށް ދެވިދާނު

ރިޝްވާން : ޖަމާއަތް މާ މުހިންމު ނަމާދުން ލިބޭ ސަވާބު މާ މުހިންމު

ފަޒީލްގެ ރައްޓެއްސެއް : ދެން މާ ނަމާދުކުރެވޭ މީހާކަށްވެގެން. އަޅެއް އިރުކޮޅަކުންވެސް ނަމާދަށް ދެވޭނު

ފަޒީލް : ތެދެކޭ އެންމެ ދުވަހަކު މަޑުކޮށްލުމުން ގެއްލުމެއްނުވާނެ

ރިޝްވާން : (ރުޅި އައިސްފަ) ބުނަން ވާހަކައެއް. ކަލޭމެން ނަމާދު ނުކުރިޔަސް އަހަރެން ކުރާނަން އެއީކީ ކަލޭމެންނާ ބެހޭ ކަމެއްނޫން. ކަލޭމެން ތިޔަ އުޅޭ އުޅުމަށް މަށެއް ނުހެއްލޭނަން

ފަޒީލް : އޭ ބްރޯ ހަމަޖެހިބަލަ. ދޭ ނަމާދަށް ގޮސްފާ އަންނަން

މިފަހަރު ނަމާދަށް ދިޔަ ރިޝްވާން އެނބުރި އައިސް ޖޯލީގާ އިށީނުމުން ފަޒީލް ހައިރާންވިޔެވެ. މިފަހަރު އޭނާގެ އަވައިގާ ރިޝްވާން ޖެހޭނެކަމަށް އޭނާ އުންމީދުކުރިޔެވެ. ނަމަވެސް ކަންވީ ހީނުކުރާ ގޮތައްށެވެ. ރިޝްވާން ޖޯލިން ތެދުވެ އެންމެން ކުރިމަތީ ހުއްޓުނެވެ.

ރިޝްވާން : އަހަރެން މީ ކަލޭމެން ވަރަށް ރަނގަޅަށް ދަސްކޮށްގެން މިތަނަށް އައި މީހެއްކަން ހަނދާންކުރާތި. ކަލޭމެނަށް އެނގޭތަ ﷲ سُبْحَانَهُ وَ تَعَالَى އަހަރުމެން ދުނިޔެއަށް ފޮނުވީ އަހަރުމެނަށް ދެއްވާފާވާ ކުޑަ ވަގުތުކޮޅު ހެޔޮގޮތުގާ ބޭނުންކުރުމަށްކަން. ކަލޭމެންނަށް އެނގޭތަ އަހަރުމެންނަކީ ކުނޑި ފުކަކަށްވުރެއްވެސް ނިކަމެތި އިންސާނުންކަން. ﷲ سُبْحَانَهُ وَ تَعَالَى ގެ ހަޒްރަތުގާވާ މަލާއިކަތުންގެ ބިޔަ ބޮޑުކަން އެނގޭނަމަ ކަލޭމެންނަށް އެއްޗެއް ވިސްނޭނެ. އަދި އަހަރުމެން ދިރިއުޅެމުން މި އަންނަ ގުރަހައަކީ ﷲ سُبْحَانَهُ وَ تَعَالَى ގެ އަތްޕުޅަށް ލައިފިނަމަ ކުނޑި ކޮޅަކަށްވުރެވެސް ކުޑަ އެއްޗެއް. ދެން ވިސްނާލަބަލަ އިންސާނާއާމެދު. މިއަދު އަހަރުމެން ކިތަންމެ މޭފުއްޕާފަ އުޅުނަސް މިއީކީ އެއްވެސް ބަޔެއްނޫން މިއީ ހަމަ ނިކަމެތި އިންސާނުން. ﷲ سُبْحَانَهُ وَ تَعَالَى އަޅުން. އެކަލާނގެއަށް ބޯލަނބައިގެން ނޫނީ ނެތް އެއްވެސް ސަލާމަތެއް. އަހަރެން އުންމީދުކުރަން ކަލޭމެން އެންމެން އެއްދުވަހުން މިސްކިތުން ފެންނާނެކަމަށް. އަހަރެން ދުއާވެސް ކުރާނަން

ރިޝްވާން ދިޔުމުން ހުރިހާ އެންމެން ބާރަކަށް ހޭންފެށިޔެވެ. އަދި މަލާމަތް ކުރަންފެށިޔެވެ. ނަމަވެސް އެމީހުންގެ އެ މަލާމަތް ވެގެންދާނީ ހީނުކުރާފަދަ އިބްރަތަކަށްށެވެ.

ދުވަސްތައް ފާއިތުވެގެންގޮސް ރޯދަމަސް އައިސް ޖެހިއްޖެއެވެ. ނަމާދުގެ ޖަމާއާތްތައް ބޮޑެތިވާންފެށިއެވެ. ގުރުއާން ކިޔެވުމުގެ އަޑު މިސްކިތްތަކުން ނުކެނޑެއެވެ. މި މާތް މަސްވަރުގެ މާތްކަން ހިތަތައް ފަތަހަކުރަމުން ގޮސް އެންމެ ފަހަށް ފަޒީލްއާ އޭނާގެ ރައްޓެހިންގެ ހިތްތައްވެސް ފަތަހަކޮށްފިޔެވެ. ހުކުރަށްށާ އީދު ނަމާދަށް ހަމައެކަނިދާ ފަޒީލްމެނަކީ މިހާރު ގަވައިދުން ނަމާދުކުރާ ބަޔެކެވެ. މި މަންޒަރު ފެނިފާ އެންމެން ހައިރާންވިޔެވެ.

އެއްދުވަހަކު ނަމާދު ނިންމާލާފައި ފަޒީލްމެނާ ރިޝްވާން ބައްދަލްކޮށްލިޔެވެ. އަދި އެންމެންގެ ހާލު އަހުވާލު އޮޅުން ފިލުވާލިޔެވެ.

ރިޝްވާން : މިއަދު އަހަރެންގެ ދުއާ ﷲ سُبْحَانَهُ وَ تَعَالَى އިޖާބަ ކުރައްވާފިކަން އެނގިއްޖެ

ފަޒީލް : އާނ ދުއާ އަކީ ވަރަށް ވަރުގަދަ ހަތިޔާރެއް އަދި ރިޝްވާން ދިން ނަސޭހަތަށް އަހަރުން މަލާމާތްކުރެވުނީތީ މައާފްއަށް އެދެން. އަހަރުމެން އެދުވަހު ރިޝްވާން ދިން ނަސޭހަތަކީ ތެދެއްތޯ ބަލަން އިންޓަނެޓުން ބެލިން ބަލަނިކޮށް ޔޫޓިޔުބު ވީޑިއަކުން ދަރުސެއް ފެނުން އެދަރުސް އަޅުވާލިތަނުން އޭގަ ކިޔާދިން ﷲ سُبْحَانَهُ وَ تَعَالَى ގެ އަރްޝިކޮޅު ހިފަހައްޓައިގެން ތިއްބެވި ކޮންމެ މަލާއިކަތެއްގެ ބޮޑުކަން ވަރަށް ތަފްސީލްކޮށް. އެއަށްފަހު އެކަމާ ވަރަށް ފިކުރު ކުރެވުން ކޮންމެ ދުވަހަކުވެސް ޖޯއްޔަށް އެއްވެ ދަރުސް އެއް ނުބަލާ ހަމަ ނުތިބެވުން އެންމެނަށް. އެހެންވެ އަހަރުމެންގެ ވިސްނުން ވަރަށް ބޮޑަށް ބަދަލްވެގެންދިޔަ. އަހަރުމެންނަކީ އެއްވެސް އެއްޗެއްނޫކަންވެސް އެނގުން. (ކަރުނަބާލަމުން) ކުނޑިކޮޅަކަށްވުރެއްވެސް އަހަރުމެން ނިކަމެތި

ރިޝްވާން : މައާފްކޮށްފިން. ދެން ހިނގާ ޖޯއްޔަށް ދަމާ

ފަޒީލްމެނަށް އައި ބަދަލާއެކު އެމީހުން ކުދިން މަގު ފުރައްދަން ގެންދާ ޖޯލިވެގެންދިޔައީ ދީނީ ނަސޭހަތްދޭ ތަނަކަށްށެވެ. ކޮންމެ ނަމާދަކަށްފަހު އެ ޖޯލީގާ ތިބެގެން ފަޒީލްމެން ކުރާ މަސައްކަތަކީ ގިނަ މީހުންނަށް ތެދުމަގު ދައްކާދިނުމެވެ.

- ނިމުނީ -